പുതുശേരി രാമചന്ദ്രന്‍ അന്തരിച്ചു
തിരുവനന്തപുരം : കവിയും സ്വാതന്ത്ര്യ സമര സേനാനിയുമായ ഡോ. പുതുശേരി രാമചന്ദ്രന്‍ (92) അന്തരിച്ചു.വാര്‍ധക്യസഹജമായ അസുഖങ്ങളെത്തുടര്‍ന്ന് ദീര്‍ഘനാളായി ചികിത്സയിലായിരുന്നു. മാവേലിക്കര താലൂക്കിലെ വള്ളികുന്നത്ത് 1928 സെപ്തംബര്‍ 23ന് പോക്കാട്ട് ദാമോദരന്‍ പിള്ളയുടെയും പുതുശ്ശേരില്‍ ജാനകിയമ്മയുടെയും മകനായാണ് ജനനം.
സ്‌കൂള്‍ വിദ്യാഭ്യാസ കാലത്തുതന്നെ സ്വാതന്ത്ര്യ സമരത്തില്‍ ആകൃഷ്ടനായി. ക്വിറ്റ് ഇന്ത്യാ സമരം, പുന്നപ്ര വയലാര്‍ സംഭവത്തെത്തുടര്‍ന്നുള്ള വിദ്യാര്‍ത്ഥി പ്രക്ഷോഭം എന്നിവയില്‍ പങ്കെടുത്തതിന് സ്കൂളുകളില്‍നിന്ന് പുറത്താക്കിയെങ്കിലും പിന്നീടു തിരിച്ചെടുത്തു. കൊല്ലം എസ്.എന്‍. കോളജ് വിദ്യാഭ്യാസകാലത്തെ സമരത്തില്‍ അറസ്റ്റും ലോക്കപ്പ് വാസവും അനുഭവിച്ചു. 1951-53 കാലത്ത് കമ്യൂണിസ്റ്റ് പാര്‍ട്ടിയുടെ വള്ളികുന്നം ശൂരനാട് ലോക്കല്‍ കമ്മിറ്റി സെക്രട്ടറിയായി. പാര്‍ട്ടിയില്‍ നിന്നും അവധിയെടുത്താണ് തിരുവനന്തപുരം യൂണിവേഴ്സിറ്റി കോളജില്‍ പഠിക്കാന്‍ ചേര്‍ന്നത്. 1953-56 ല്‍ യൂണിവേഴ്സിറ്റി കോളജില്‍ നിന്നും ബി.എ. (ഓണേഴ്സ്) ഒന്നാം റാങ്കോടെ ജയിച്ചു. 1957 ല്‍ കൊല്ലം എസ്.എന്‍. കോളേജില്‍ അധ്യാപകനായി. പിന്നീട് ശിവഗിരി എസ്.എന്‍.കോളജില്‍ അധ്യാപകനായി. 1969 ല്‍ കേരള സര്‍വകലാശാല മലയാള വിഭാഗത്തില്‍ അധ്യാപകനായി. 1988 ല്‍ ഔദ്യോഗിക ജീവിതത്തില്‍ നിന്ന് വിരമിച്ചു.
2009 ല്‍ കേരള സാഹിത്യ അക്കാഡമി വിശിഷ്ടാംഗത്വം ലഭിച്ചു. 2014 ല്‍ കേന്ദ്ര സാഹിത്യ അക്കാഡമിയുടെ ഭാഷാസമ്മാന്‍ അവാര്‍ഡും ലഭിച്ചു. 2015ല്‍ സംസ്ഥാന സര്‍ക്കാരിന്‍റെ എഴുത്തച്ഛന്‍ പുരസ-്കാരം ലഭിച്ചു. മഹാകവി മൂലൂര്‍ അവാര്‍ഡ് മഹാകവി പി. അവാര്‍ഡ്, മഹാകവി ഉള്ളൂര്‍ അവാര്‍ഡ്, എന്‍.വി. കൃഷ്ണവാര്യര്‍ അവാര്‍ഡ്, കുമാരനാശാന്‍ അവാര്‍ഡ്, വള്ളത്തോള്‍ പുരസ്കാരം എന്നിവയും ലഭിച്ചു. മലയാളത്തിന് ശ്രേഷ്ഠഭാഷാ പദവി നേടിയെടുക്കുന്നതില്‍ മുഖ്യപങ്ക് വഹിച്ചു.
പരേതയായ ബി.രാജമ്മയാണ് ഭാര്യ. മക്കള്‍: ഡോ.ഗീത ആര്‍.പുതുശ്ശേരി (റിട്ട. പ്രഫസര്‍, എന്‍.എസ്.എസ്.വനിതാ കോളജ്, കരമന), പി.ആര്‍.ഉണ്ണികൃഷ്ണന്‍ (അസി. ജനറല്‍ മാനേജര്‍, ഇന്ത്യന്‍ ഓവര്‍സീസ് ബാങ്ക്, ചെന്നൈ), പി.ആര്‍ ഹേമചന്ദ്രന്‍ (യുഎസ്എ), പി.ആര്‍.പ്രേമചന്ദ്രന്‍ (സിവില്‍ സപ്ലൈസ്, തിരുവനന്തപുരം) പി.ആര്‍.ജയചന്ദ്രന്‍ (റിട്ട.ഗ്രൂപ്പ് ക്യാപ്റ്റന്‍, എയര്‍ ഫോഴ്സ്) പി.ആര്‍. ശ്യാമചന്ദ്രന്‍ (കാനഡ). മരുമക്കള്‍: ഡോ.കെ.എസ്.രവികുമാര്‍ (പ്രോ-വൈസ് ചാന്‍സലര്‍, സംസ്കൃത സര്‍വകലാശാല, കാലടി), കെ.പി.ഗീതാമണി (അസി.ഡയറക്ടര്‍, കൃഷി വകുപ്പ്) ശ്രീദേവി നായര്‍ (യു.എസ്.എ), ഇന്ദു (കോളജ് വിദ്യാഭ്യാസ ഡയറക്ടറേറ്റ്), രേഷ്മ ജയചന്ദ്രന്‍
വയനാട് സി.പി.എം ജില്ലാ സെക്രട്ടറിയായിരുന്ന പി ഗഗാറിനെ മാറ്റി, പകരം കെ റഫീഖിന് ചുമതല കൈമാറി 
