ബി.ജെ.പി ദേശീയ കൗണ്‍സിലിന് കോഴിക്കോട്ട് തുടക്കമായി; ന്യൂനപക്ഷങ്ങളെ പാര്‍ട്ടിയിലേക്ക് അടുപ്പിക്കാന്‍ പ്രത്യേക കര്‍മ പരിപാടി
കോഴിക്കോട്: കേരളത്തിലാദ്യമായി നടക്കുന്ന ബി.ജെ.പി ദേശീയ സമ്മേളനത്തിന് കടവ് റിസോര്‍ട്ടിലെ ടി.എന്‍ ഭരതന്‍ നഗറില്‍ തുടക്കമായി. രാവിലെ ദേശീയ അധ്യക്ഷന്‍ അമിത്ഷായുടെ അധ്യക്ഷതയില്‍ ചേര്‍ന്ന ദേശീയ ജനറല്‍ സെക്രട്ടറിമാരുടെ യോഗത്തോടെയാണ് ത്രിദിന സമ്മേളനത്തിന് തിരശീല ഉയര്‍ന്നത്. യോഗത്തില്‍ സമ്മേളനത്തിന്റെ അജണ്ട തീരുമാനിക്കും. ഈ യോഗത്തില്‍ കേരളത്തില്‍ നിന്ന് ആരും പങ്കെടുക്കുന്നില്ല.
ഉച്ചകഴിഞ്ഞ് മൂന്ന് മണിക്ക് ബി.ജെ.പി ദേശീയ ഭാരവാഹികള്‍, സംസ്ഥാന പ്രഭാരിമാര്‍, സംസ്ഥാന പ്രസിഡന്റുമാര്‍, സംസ്ഥാന സംഘടനാ സെക്രട്ടറിമാര്‍ എന്നിവര്‍ പങ്കെടുക്കുന്ന യോഗം തുടങ്ങി. രാത്രി എട്ട് മണി വരെ യോഗം നീണ്ടുനില്‍ക്കും. സമ്മേളനത്തിന്റെ വിശദാംശങ്ങള്‍, അവതരിപ്പിക്കേണ്ട രാഷ്ട്രീയ പ്രമേയങ്ങള്‍ എന്നിവ യോഗം ചര്‍ച്ച ചെയ്യും. സംസ്ഥാന പ്രസിഡന്റ്കുമ്മനം രാജശേഖരന്‍, സെക്രട്ടറിമാരായ എല്‍. ഗണേഷ്, സുഭാഷ് എന്നിവര്‍ക്കാണ് ഈ യോഗത്തില്‍ പങ്കെടുക്കാന്‍ കഴിയുക. തെലങ്കാന സംസ്ഥാനത്തിന്റെ പ്രഭാരിയായതിനാല്‍ മുന്‍ സംസ്ഥാന പ്രസിഡന്റ്് പി.കെ. കൃഷ്ണദാസും യോഗത്തില്‍ പങ്കെടുക്കും.
ന്യൂനപക്ഷങ്ങളെ പാര്‍ട്ടിയിലേക്ക് അടുപ്പിക്കാന്‍ ബിജെപിക്കു പ്രത്യേക കര്‍മ പരിപാടി. ബിജെപി സംസ്ഥാന നേതൃത്വം തയാറാക്കിയ രാഷ്ട്രീയ റിപ്പോര്‍ട്ടിലാണു ന്യൂനപക്ഷങ്ങളുടെ പിന്തുണ അനിവാര്യമാണെന്നു വ്യക്തമാക്കുന്നത്. ഇതുസംബന്ധിച്ച രാഷ്ട്രീയ നിര്‍ദേശം കേന്ദ്ര നേതൃത്വത്തിനു സമര്‍പ്പിച്ചു. ക്രൈസ്തവ സഭകളുമായി അടുപ്പം ഉണ്ടാക്കേണ്ടതിന്റെ കാരണങ്ങള്‍ ബിജെപി സംസ്ഥാന പ്രസിഡന്റ് കുമ്മനം രാജശേഖരന്‍ നല്‍കിയ റിപ്പോര്‍ട്ടില്‍ അക്കമിട്ടു പറയുന്നുണ്ട്.
മെയ്ക്ക് ഇന്‍ ഇന്ത്യ പദ്ധതി പോലെ മെയ്ക്ക് ഇന്‍ കേരള പദ്ധതി വേണമെന്ന് കേരളം അവശ്യപ്പെട്ടിട്ടുണ്ട്. ആറന്മുള, പമ്പ പ്രദേശങ്ങളെ ഉള്‍പ്പെടുത്തി 200 ഏക്കറില്‍ പൈതൃകഗ്രാമം പദ്ധതി വേണമെന്ന നിര്‍ദേശവും കേരളം മുന്നോട്ടുവച്ചിട്ടുണ്ട്.
സമ്മേളനത്തോടനുബന്ധിച്ച് ശനിയാഴ്ച ബീച്ചില്‍ നടക്കുന്ന പൊതുസമ്മേളനത്തിലും സ്വപ്നനഗരിയില്‍ നടക്കുന്ന ദേശീയ കൗണ്‍സില്‍ യോഗത്തിലും പ്രധാനമന്ത്രി നരേന്ദ്ര മോദി പങ്കെടുക്കും.
ബി.ജെ.പിയുടെ മുതിര്‍ന്ന നേതാക്കളായ എല്‍.കെ. അദ്വാനി, മുരളീ മനോഹര്‍ ജോഷി എന്നിവര്‍ നാളെ എത്തുമെന്നാണ് സംഘാടകരുടെ പ്രതീക്ഷ. സമ്മേളനം റിപ്പോര്‍ട്ട് ചെയ്യുന്നതിനായി ഡല്‍ഹിയില്‍ നിന്നും ഇന്ത്യയുടെ വിവിധ ഭാഗങ്ങളില്‍ നിന്നും വലിയൊരു മാധ്യമപ്പട തന്നെ കോഴിക്കോട് എത്തിയിട്ടുണ്ട്.
വയനാട് സി.പി.എം ജില്ലാ സെക്രട്ടറിയായിരുന്ന പി ഗഗാറിനെ മാറ്റി, പകരം കെ റഫീഖിന് ചുമതല കൈമാറി 
