കാറോടിച്ചത് ആരെന്ന മൊഴികളിൽ വൈരുധ്യം; ശ്രീറാമെന്ന് സാക്ഷികൾ, വഫയെന്ന് ശ്രീറാം, സർവത്ര ദുരൂഹത

തിരുവനന്തപുരം: ഐ.എ.എസ്. ഉദ്യോഗസ്ഥൻ ശ്രീറാം വെങ്കിട്ടരാമൻ സഞ്ചരിച്ച കാറിടിച്ച് മാധ്യമ പ്രവർത്തകൻ മരിച്ച സംഭവത്തിൽ ദുരൂഹതയേറുന്നു. അപകടസമയത്ത് വാഹനം ഓടിച്ചത് സുഹൃത്ത് വഫ ഫിറോസാണന്ന് ശ്രീറാം പൊലീസിനോട് പറഞ്ഞു. താൻ തന്നെയാണ് കാറോടിച്ചതെന്ന് വഫ പൊലീസിനു മുന്നിൽ ശരിവയ്ക്കുകയും ചെയ്തു. എന്നാൽ ഇതിനു ഘടകവിരുദ്ധമായാണ് ദൃക്സാക്ഷികളുടെ മൊഴി. വാഹനം ഓടിച്ചത് ശ്രീറാം തന്നെയെന്നാണ് അപകടം നേരിൽകണ്ടവർ പറയുന്നത്.

ശ്രീറാം വെങ്കിട്ടരാമൻ തന്നെയാണ് കാറൊടിച്ചിരുന്നതെന്ന് അപകടസമയത്ത് സ്ഥലത്തുണ്ടായിരുന്ന ഓട്ടോ ഡ്രൈവർമാരായ ഷഫീക്ക്, മണികുട്ടൻ എന്നിവർ വെളിപ്പെടുത്തി. കാറിൽ ഇടതു വശത്താണ് വഫ ഇരുന്നതെന്നാണ് ദൃക്സാക്ഷികളുടെ മൊഴി. കൂടാതെ, കാ​റി​ലു​ണ്ടാ​യി​രു​ന്ന​വ​ർ മ​ദ്യ​പി​ച്ചി​രു​ന്ന​താ​യി പ്ര​ഥ​മ​ദൃ​ഷ്ട്യാ മ​ന​സി​ലാ​യി​ട്ടും ഇ​രു​വ​രു​ടേ​യും ര​ക്ത​പ​രി​ശോ​ധ​ന ന​ട​ത്താ​ൻ പൊ​ലീ​സ് ത​യാ​റാ​കാ​തി​രു​ന്ന​തും സം​ശ​യ​ങ്ങ​ൾ​ക്ക് ഇ​ട​വ​രു​ത്തു​ന്നു.

ജനറൽ ആശുപത്രിയിൽ ശ്രീറാം വെങ്കിട്ടരാമനെ എത്തിച്ച സമയത്ത് മദ്യപിച്ചതിന്‍റെ മണം ഉണ്ടായിരുന്നെന്നും ദേഹപരിശോധന നടത്തണമെന്നു മാത്രമാണ് പൊലീസ് ആവശ്യപ്പെട്ടതെന്നും പരിശോധിച്ച ഡോക്റ്റർ ഒരു ചാനലിൽ വെളിപ്പെടുത്തിയിട്ടുണ്ട്. അ​പ​ക​ട​ത്തി​ൽ ഒ​രാ​ൾ മ​രി​ച്ച സം​ഭ​വ​മാ​യി​രു​ന്നി​ട്ടും തു​ട​ക്ക​ത്തി​ൽ പൊ​ലീ​സ് കേ​സ് രജിസ്റ്റർ ചെയ്യാതി​രു​ന്ന​തു​ കാരണമാ​ണ് ര​ക്ത​പ​രി​ശോ​ധ​ന​യ്ക്കാ​യി ഡോ​ക്റ്റർ​ക്ക് നി​ർ​ദേ​ശി​ക്കാ​ൻ സാ​ധി​ക്കാ​തി​രു​ന്ന​ത്. കൈ​യ്ക്കു പ​രുക്കേറ്റ ശ്രീ​റാ​മി​നെ മെ​ഡി​ക്ക​ൽ കോ​ളെ​ജ് ആ​ശു​പ​ത്രി​യി​ലേ​ക്ക് റ​ഫ​ർ ചെ​യ്തെ​ങ്കി​ലും സ്വ​കാ​ര്യ ആ​ശു​പ​ത്രി​യി​ലാ​ണ് ചി​കി​ത്സ തേ​ടി​യ​ത്. ശ്രീ​റാ​മി​ന്‍റെ ഇ​ഷ്ട​പ്ര​കാ​ര​മാ​ണ് സ്വ​കാ​ര്യ ആ​ശു​പ​ത്രി​യി​ൽ ചികിത്സ തേടിയത്.

ശനിയാഴ്ച പുലർച്ചെ ഒരു മണിയോടെ തിരുവനന്തപുരം മ്യൂസിയം പൊലീസ് സ്റ്റേഷന് സമീപമായിരുന്നു അപകടം. കാറിൽ ശ്രീറാം വെങ്കിട്ടരാമനൊപ്പമുണ്ടായിരുന്ന സുഹൃത്ത് വഫയെ പൊലീസ് കസ്റ്റഡിയിൽ എടുക്കാതെ ആദ്യം വിട്ടയച്ചു. വൈദ്യപരിശോധനയ്ക്ക് വിധേയയാക്കിയുമില്ല. തുടർന്ന് മാധ്യമപ്രവർത്തകർ പൊലീസ് സ്റ്റേഷനിലെത്തി കാര്യങ്ങൾ തിരക്കിയപ്പോഴാണ് ഇവരെ ഫോണിൽ വിളിച്ച് വീണ്ടും സ്റ്റേഷനിലെത്തിച്ച് മൊഴി രേഖപ്പെടുത്തിയത്. വ​ഫ​യു​ടെ പേ​രി​ലു​ള്ള കാ​റാ​യി​ട്ടു​പോ​ലും പൊ​ലീ​സ് മ​റ്റു ന​ട​പ​ടി​ക​ളൊ​ന്നും സ്വീ​ക​രി​ച്ചു​മി​ല്ല. ഗൾഫിൽ മോഡലിങ് രംഗത്ത് പ്രവർത്തിച്ചു വരികയാണ് വഫ.  

അതിനിടെ, അപകടത്തിൽ മനഃപൂർവമല്ലാത്ത നരഹത്യയ്ക്ക് പൊലീസ് കേസെടുത്തു. വാഹനമോടിച്ചത് ആരെന്ന് തിരിച്ചറിഞ്ഞതായും വിവരം ഉടൻ പുറത്തുവിടുമെന്നും തിരുവനന്തപുരം സിറ്റി പൊലീസ് കമ്മിഷണർ ഐ.ജി സഞ്ജയ് കുമാര്‍ ഗരുഡിൻ മാധ്യമങ്ങളോടു പറഞ്ഞു. സംഭവസ്ഥലത്തെ സിസിടിവി പരിശോധിക്കും. എന്നാൽ പുറത്തുവന്ന ദൃശ്യങ്ങൾ വ്യക്തമല്ലെന്ന് മാധ്യമപ്രവർത്തകർ സൂചിപ്പിച്ചപ്പോൾ എല്ലായിടത്തും സിസിടിവി വയ്ക്കാനാവില്ലെന്നായിരുന്നു കമ്മിഷണറുടെ മറുപടി. അപകടത്തിൽ ഫൊറൻസിക് പരിശോധന നടത്തുമെന്നും അദ്ദേഹം പറഞ്ഞു.