കെ.ബി ഗണേഷ്‌കുമാര്‍ യുവാവിനെ മര്‍ദിച്ച കേസ് ഒത്തുതീര്‍പ്പിലേക്ക്; ബാലകൃഷ്ണപിള്ള ഇടപെട്ടു; മാപ്പ് എഴുതി നല്‍കണമെന്ന് യുവാവിന്റെ കുടുംബം
അഞ്ചല്‍ (കൊല്ലം): കാറിനു സൈഡ് കൊടുത്തില്ലെന്ന പേരില്‍ അമ്മയുടെ മുന്നില്‍ വച്ചു യുവാവിനെ മര്‍ദിച്ച സംഭവത്തില്‍ ഗണേഷ് കുമാര്‍ എംഎല്‍എ ഒത്തുതീര്‍പ്പിന്. സംഭവത്തില്‍ ഗണേഷിന്റെ പിതാവ് ആര്‍.ബാലകൃഷ്ണ പിള്ളയും ഇടപെട്ടതായാണു സൂചന. കേസില്‍ മര്‍ദിക്കപ്പെട്ട അനന്തകൃഷ്ണന്റെ അമ്മ ഷീനയുടെ രഹസ്യമൊഴി കഴിഞ്ഞയാഴ്ച കോടതി രേഖപ്പെടുത്തിയിരുന്നു. ഇതിനു പിന്നാലെയാണ് കേസ് അടിയന്തരമായി ഒത്തുതീര്‍പ്പാക്കാന്‍ ഗണേഷിന്റെ ഭാഗത്തു നിന്നുള്ള ശ്രമം.
ഇതു സംബന്ധിച്ച ചര്‍ച്ച ഉടന്‍ നടക്കുമെന്നാണറിയുന്നത്. ഗണേഷ് ഒന്നുകില്‍ പരസ്യമായി മാപ്പു പറയണം അല്ലെങ്കില്‍ മാപ്പ് എഴുതി നല്‍കണമെന്നാണ് ആവശ്യം. സംഭവത്തില്‍ പ്രാദേശിക സമുദായ സംഘടനയും ഒത്തുതീര്‍പ്പു ശ്രമം നടത്തിയതായി റിപ്പോര്‍ട്ടുകളുണ്ട്.
ജൂണ്‍ 13ന് ഉച്ചയ്ക്ക് ഒന്നരയോടെ അഗസ്ത്യക്കോട് വച്ച് ഷീനയും മകന്‍ അനന്തകൃഷ്ണനും എംഎല്‍എയുടെ ഉപദ്രവത്തിന് ഇരകളായി എന്നാണു പരാതി. ഇടുങ്ങിയ റോഡില്‍, ഗണേഷ്‌കുമാറിന്റെ കാറിന് എതിര്‍ദിശയില്‍ കാറില്‍ വന്ന അനന്തകൃഷ്ണന്‍ സൈഡ് കൊടുത്തില്ലെന്ന് ആരോപിച്ചായിരുന്നു മര്‍ദനം. ഗണേഷ്‌കുമാര്‍ അനന്തകൃഷ്ണനെ മര്‍ദിക്കുകയും തടസ്സം പിടിക്കാന്‍ചെന്ന ഷീനയെ അസഭ്യം പറയുകയും അശ്ലീലച്ചുവയുള്ള ആംഗ്യം കാട്ടുകയും ചെയ്‌തെന്നാണു പരാതി.
എന്നാല്‍ ഗണേഷിനെതിരെ ദുര്‍ബല വകുപ്പുകളാണു ചുമത്തിയത്. മര്‍ദനമേറ്റ അനന്തകൃഷ്ണനെതിരെ കേസ് എടുക്കുകയും ചെയ്തു. പൊലീസിന്റെ ഒളിച്ചുകളി വ്യാപക പ്രതിഷേധത്തിന് ഇടയാക്കിയിരുന്നു. ഗണേഷ്‌കുമാര്‍ റോഡില്‍വച്ചു കയ്യില്‍ കടന്നു പിടിക്കുകയും അസഭ്യം പറയുകയും ചെയ്‌തെന്നു പരാതിപ്പെട്ട ഷീന കോടതിയില്‍ നല്‍കിയ രഹസ്യമൊഴിയുടെ പകര്‍പ്പ് പൊലീസിനു ലഭിച്ചിരുന്നു. മൊഴിയിലെ വിവരങ്ങള്‍ പരിശോധിച്ചശേഷം തുടര്‍നടപടി സ്വീകരിക്കുമെന്നാണു സൂചന.
ഇതിനിടെ എംഎല്‍എയ്‌ക്കെതിരെ സ്ത്രീകള്‍ക്കു നേരെയുള്ള അതിക്രമത്തിനു സ്വീകരിക്കുന്ന വകുപ്പുകള്‍ ചുമത്തിയേക്കുമെന്ന സൂചനയെത്തുടര്‍ന്നാണ് ഒത്തുതീര്‍പ്പിനു ശ്രമം ആരംഭിച്ചത്. മൊഴിയില്‍ ഗണേഷിനെതിരെ ഗുരുതരമായ ആരോപണങ്ങള്‍ ഉണ്ടെന്നു സൂചനയുണ്ട്. അന്വേഷണ ഉദ്യോഗസ്ഥനായ അഞ്ചല്‍ സിഐ ടി.സതികുമാറാണു മൊഴിപകര്‍പ്പ് ഏറ്റുവാങ്ങിയത്.
പിള്ളയുടെ അകന്ന ബന്ധുവാണ് സംഭവത്തില്‍ ഉള്‍പ്പെട്ട ഷീനയും മകനുമെന്നാണു വിവരം. കേസില്‍പ്പെട്ടതില്‍ കുടുംബം ഭയചകിതരാണ്. പിള്ളയെ പിണക്കാനും താല്‍പര്യമില്ല. എന്‍ജിനീയറിങ് ബിരുദധാരിയായ അനന്തകൃഷ്ണനെതിരെ ജാമ്യമില്ലാ വകുപ്പു പ്രകാരമാണു കേസെടുത്തിരിക്കുന്നത്. ജനപ്രതിനിധിയെ വഴിയില്‍ തടഞ്ഞു നിര്‍ത്തി മര്‍ദിച്ചു എന്നാണു കേസ്. സംഭവത്തില്‍ ഒത്തുതീര്‍പ്പിനു രാഷ്ട്രീയമായും പൊലീസില്‍ നിന്നും സമ്മര്‍ദമുണ്ട്. കേസ് ഒത്തുതീര്‍പ്പാക്കാന്‍ സമുദായ സംഘടനയും ഇടപെട്ടു.
ഷീനയുടെ ഭര്‍ത്താവ് വിദേശത്തു നിന്ന് എത്തിയിട്ടുണ്ട്. ഇദ്ദേഹം നാളെ മടങ്ങാനിരിക്കുകയാണ്. അതിനു മുന്‍പ് ഒത്തുതീര്‍പ്പിലെത്താനാണു ശ്രമം. എന്നാല്‍ ഒത്തുതീര്‍പ്പു ചര്‍ച്ച എവിടെയാണെന്നതു സംബന്ധിച്ച വിവരം പുറത്തുവന്നിട്ടില്ല. നിയമസഭയില്‍ ഉള്‍പ്പെടെ താന്‍ നിരപരാധിയാണെന്ന കാര്യം ഗണേഷ്‌കുമാര്‍ ആവര്‍ത്തിച്ചിരുന്നു. മാധ്യമങ്ങള്‍ക്കു തന്നോടുള്ള ശത്രുതയാണു സംഭവത്തിനു പിന്നിലെന്നും അദ്ദേഹം പറഞ്ഞു. കുറ്റക്കാരനല്ലെന്ന് ആവര്‍ത്തിച്ചിട്ടും ഒത്തുതീര്‍പ്പിനു ശ്രമിച്ചതാണ് ഇപ്പോള്‍ വിവാദത്തിലേക്കു നയിച്ചിരിക്കുന്നത്.
വയനാട് സി.പി.എം ജില്ലാ സെക്രട്ടറിയായിരുന്ന പി ഗഗാറിനെ മാറ്റി, പകരം കെ റഫീഖിന് ചുമതല കൈമാറി 
