വിഴിഞ്ഞത്ത് 4 മാസത്തിനിടെ എത്തിയത് ഒരു ലക്ഷം കണ്ടെയ്‌നറുകൾ

തിരുവനന്തപുരം: വിഴിഞ്ഞം അന്താരാഷ്‌ട്ര തുറമുഖം ട്രയൽ റൺ ആരംഭിച്ച് നാല് മാസത്തിനിടെ എത്തിയത് ഒരു ലക്ഷം റ്റി.ഇ.യു(ട്വിൻറി ഫൂട്ട് ഇക്വലൻറ് യൂണിറ്റ്) കണ്ടെയ്‌നർ.

ഇതുവഴി 7.4 കോടി രൂപയുടെ വരുമാനമാണ് ജിഎസ്ടി ഇനത്തിൽ സർക്കാർ ഖജനാവിലേക്ക് എത്തിയത്. ശനി‍യാഴ്ച രാത്രിയോടെയാണ് ഒരു ലക്ഷം റ്റി.ഇ.യുവെന്ന നാഴികക്കല്ല് തുറമുഖം പിന്നിട്ടതെന്ന് തുറമുഖ വകുപ്പ് മന്ത്രി വി.എൻ വാസവൻ പറഞ്ഞു. 1,00,807 ടിഇയു ആണ് ഇവിടെ കൈകാര്യം ചെയ്തത്. ഇതിനകം ലോകത്തിലെ വമ്പൻ ചരക്ക് കപ്പലുകൾ കേരളത്തിൻറെ തീരത്തെത്തിക്കഴിഞ്ഞു.

നവംബർ ഒൻപത് വരെയുള്ള കണക്ക് അനുസരിച്ച് 46 കപ്പലുകളാണ് തുറമുഖത്ത് എത്തിയത്. ജൂലൈ മാസത്തിൽ മൂന്ന്, സെപ്റ്റംബറിൽ 12, ഒക്ടോബറിൽ 23, നവംബർ മാസത്തിൽ ഇതുവരെ എട്ട് എന്നിങ്ങനെയാണ് തുറമുഖത്ത് എത്തിച്ചേർന്ന കപ്പലുകളുടെ എണ്ണം.

ലോകത്തെ ഏറ്റവും വലിയ ചരക്ക് കപ്പലുകളുടെ ശ്രേണിയിൽപ്പെടുന്ന എംഎസ്‍സി ക്ലോഡ് ഗിരാർഡെറ്റ്, അന്ന, വിവിയാന, എന്നീ കപ്പലുകൾ എത്തിച്ചേർന്നു. ഇവയ്ക്ക് പിന്നാലെ മറ്റ് കപ്പലുകളും എത്തുമെന്നും വിഴിഞ്ഞം ഇന്ത്യയുടെ സുവർണ്ണതീരമായി മാറുകയാണെന്നും മന്ത്രി ചൂണ്ടിക്കാട്ടി.

ലോകത്തെ ഏറ്റവും വലിപ്പമുള്ള മദർ ഷിപ്പുകൾ അഥവ മാതൃ യാനങ്ങൾക്ക് നങ്കൂരമിടാൻ സൗകര്യമുള്ള ഇന്ത്യയിലെ ഏക ട്രാൻസ്ഷിപ്പ്‌മെൻറ് തുറമുഖമായി അന്താരാഷ്‌ട്ര മാരിടൈം ഭൂപടത്തിലിടം നേടിയ വിഴിഞ്ഞം, ഇന്ത്യയിലെ മറ്റ് തുറമുഖങ്ങളിൽ നിന്ന് ഏറെ വ്യത്യസ്‌തമാണ്.

ആദ്യ വർഷം തന്നെ 15 ലക്ഷം റ്റി.ഇ.യു കണ്ടെയ്‌നർ കൈകാര്യശേഷിയാണ് വിഴിഞ്ഞം അന്താരാഷ്‌ട്ര തുറമുഖം ലക്ഷ്യമിടുന്നത്. പ്രതിവർഷം ഇത്രയും ചരക്ക് കൈകാര്യം ചെയ്യാൻ കഴിയുന്ന തുറമുഖം ഇന്ത്യയിൽ മറ്റെവിടെയുമില്ലെന്നതാണ് വിഴിഞ്ഞത്തെ വ്യത്യസ്തമാക്കുന്നത്.

തുറമുഖത്തിൻറെ ആദ്യഘട്ടം ഈ വർഷം ഡിസംബറോടെ കമ്മീഷൻ ചെയ്യാനാണ് നിലവിലെ തീരുമാനം. രണ്ടും മൂന്നും ഘട്ടങ്ങൾ 2028 ഡിസംബറോടെ പൂർത്തിയാകുമെന്ന് പ്രതീക്ഷിക്കുന്നതായും മന്ത്രി വാസവൻ അറിയിച്ചിരുന്നു.