തൃശൂരിൽ വിവിധ ഡാമുകൾ തുറന്നു; ചാലക്കുടി പുഴയുടെ തീരത്തുള്ളവർ ജാഗ്രത പാലിക്കണമെന്ന മുന്നറിയിപ്പ് നൽകി
തൃശൂര്: അതിതീവ്ര മഴ തുടരുന്ന സാഹചര്യത്തിൽ വിവിധ ഡാമുകൾ തുറന്നതായും ജാഗ്രത പാലിക്കാനും ജില്ലാ ഭരണകൂടം അറിയിച്ചു. ജില്ലയില് പീച്ചി, വാഴാനി, പെരിങ്ങല്ക്കുത്ത്, പൂമല, അസുരന്കുണ്ട്, പത്താഴക്കുണ്ട് ഡാമുകള് തുറന്നു.
അതിശക്തമായ മഴയെ തുടര്ന്ന് അതിരപ്പിള്ളി, വാഴച്ചാൽ വിനോദ സഞ്ചാര കേന്ദ്രം അടച്ചു. പീച്ചി ഡാമിന്റെ നാല് സ്പില്വേ ഷട്ടറുകള് 150 സെ.മീ വീതവും, വാഴാനി ഡാമിന്റെ നാല് ഷട്ടറുകള് 90 സെ.മീ വീതമാണ് തുറന്നത്.
പൂമല ഡാമിന്റെ നാല് ഷട്ടറുകള് 15 സെ.മീ വീതവും പത്താഴക്കുണ്ട് ഡാമിന്റെ നാല് ഷട്ടറുകള് എട്ട് സെ.മീ വീതവും തുറന്നു. പെരിങ്ങല്ക്കുത്ത് ഡാമിന്റെ ഏഴ് ഷട്ടറുകളും ഒരു സ്ല്യൂസ് ഗേറ്റും തുറന്നിട്ടുണ്ട്.
ഇതുകൂടാതെ തുണക്കടവ് ഡാം തുറന്നു വെള്ളം പെരിങ്ങല്ക്കുത്തിലേക്ക് ഒഴുക്കുന്നുണ്ട്. തമിഴ്നാട് ഷോളയാര് ഡാം തുറന്ന് വെള്ളം കേരള ഷോളയാറിലേക്ക് ഒഴുക്കുന്നുണ്ട്.
ചാലക്കുടി പുഴയുടെ താഴ്ന്ന പ്രദേശങ്ങളില് വെള്ളം കയറാന് സാധ്യതയുള്ളതിനാൽ പ്രദേശങ്ങളില് നിന്ന് എല്ലാവരോടും ക്യാമ്പിലേക്ക് മാറാന് നിര്ദേശം നല്കിയിട്ടുണ്ട്.
മഴ തുടരുന്ന സാഹചര്യത്തില് കുട്ടികള് ഉള്പ്പെടെയുള്ള പൊതുജനങ്ങള് ജലാശയത്തിന് സമീപത്തിലേക്ക് പോകുകയോ ഇറങ്ങുകയോ ചെയ്യരുതെന്നും ആവശ്യമെങ്കില് ക്യാമ്പുകളിലേക്ക് മാറ്റി പാര്പ്പിക്കുന്നതിന് നടപടി സ്വീകരിച്ച് വരുന്നതായും ഭരണകൂടം അറിയിച്ചു.
വയനാട് സി.പി.എം ജില്ലാ സെക്രട്ടറിയായിരുന്ന പി ഗഗാറിനെ മാറ്റി, പകരം കെ റഫീഖിന് ചുമതല കൈമാറി 
