കേരളത്തിലെ പദ്ധതി നിർവഹണത്തിലെ പുരോഗതി, തൃപ്തി അറിയിച്ച് ലോക ബാങ്ക്
തിരുവനന്തപുരം: പദ്ധതി നിർവഹണത്തിൽ കേരളം മികച്ച പുരോഗതി കൈവരിച്ചെന്ന് ലോക ബാങ്ക് പ്രതിനിധികൾ. റീബിൽഡ് കേരള ഇനിഷ്യേറ്റീവ് വഴി നടപ്പാക്കുന്ന റസിലിയന്റ് കേരള പ്രോഗ്രാം ഫോർ റിസൾട്ട്സ് സംബന്ധിച്ച് മുഖ്യമന്ത്രി പിണറായി വിജയനുമായി നടത്തിയ കൂടിക്കാഴ്ചയിലാണ് പദ്ധതി നിർവഹണത്തിലെ പുരോഗതിയിൽ ലോക ബാങ്ക് പ്രതിനിധികൾ തൃപ്തി അറിയിച്ചത്.
ചില പദ്ധതികളുടെ പൂർത്തീകരണത്തിലെ കാലതാമസം പരിഹരിക്കാനും സംഘം നിർദേശിച്ചു. കോൾനില കൃഷിയിൽ കേരളത്തിൽ നടപ്പാക്കുന്ന പദ്ധതി സമാനതകളില്ലാത്തതാണെന്നും വലിയമുന്നേറ്റം ഇക്കാര്യത്തിൽ ഉണ്ടായെന്നും ലോകബാങ്ക് സംഘം അഭിപ്രായപ്പെട്ടു.
ഫെബ്രുവരി ഒമ്പതുവരെ നടക്കുന്ന ഇടക്കാല അവലോകനത്തിന്റെ ഭാഗമായായിരുന്നു കൂടിക്കാഴ്ച. റസിലിയന്റ് കേരള പ്രോഗ്രാം ഫോർ റിസൾട്ട്സ് (ആർകെഡിപി) വിഭാവനം ചെയ്യുന്ന പദ്ധതികൾ 2019 – 2027 കാലയളവിലാണ് നടപ്പാക്കുന്നത്.
ബജറ്റ് വിഹിതത്തിനു പുറമെ ലോകബാങ്ക്, ജർമൻ ബാങ്ക് തുടങ്ങിയ രാജ്യാന്തര ഏജൻസികളിൽനിന്ന് ഫണ്ട് സ്വരൂപിച്ചാണ് വികസന പ്രവർത്തനങ്ങൾ നടപ്പാക്കുക.
യോഗത്തിൽ മന്ത്രിമാരായ കെ.എൻ ബാലഗോപാൽ, എം.ബി രാജേഷ്, ചീഫ് സെക്രട്ടറി ഡോ. വി വേണു, ലോക ബാങ്ക് പ്രതിനിധികളായ എലിഫ് ഐഹാൻ, ദീപക് സിങ്, ബാലകൃഷ്ണ മേനോൻ പരമേശ്വരൻ, നട്സുകോ കികുടാകെ, വിജയ ശേഖർ കലാവകോണ്ട, എ.എഫ്.ഡി പ്രതിനിധികളായ ജൂലിയൻ ബോഗ്ലിറ്റോ, ജ്യോതി വിജയൻ നായർ, കെ.എഫ്.ഡബ്ല്യു പ്രതിനിധികളായ കിരൺ അവധാനുല, രാഹുൽ മൻകോഷ്യ എന്നിവരും പങ്കെടുത്തു.
വയനാട് സി.പി.എം ജില്ലാ സെക്രട്ടറിയായിരുന്ന പി ഗഗാറിനെ മാറ്റി, പകരം കെ റഫീഖിന് ചുമതല കൈമാറി 
