ഡൽഹിയിൽ വായുമലിനീകരണം അപകടാവസ്ഥയിൽ
ന്യൂഡൽഹി: നേരിയ തോതിൽ ആശ്വാസം കണ്ടെത്തിയ ഡൽഹിയിൽ ദീപാവലി ആഘോഷങ്ങൾക്ക് പിന്നാലെ വീണ്ടും വായുമലിനീകരണം ഗുരുതരാവസ്ഥയിൽ.
ചൊവ്വാഴ്ച രാവിലെ പുറത്തുവന്ന കണക്കു പ്രകാരം വിവിധ പ്രദേശങ്ങളിൽ വായു ഗുണനിലവാര സൂചിക 360 നും മുകളിലാണ്. ഡൽഹിയിൽ പലയിടങ്ങളും കനത്ത പുകമഞ്ഞ് മൂടിയ നിലയിലാണ്.
ഇതേത്തുടർന്ന് ജനങ്ങൾക്ക് കണ്ണെരിച്ചിലും ശ്വാസംമുട്ടലും അടക്കമുള്ള പ്രയാസങ്ങൾ അനുഭവപ്പെട്ടു. ബാവന(434), നരേല(418), രോഹിണി(417), ആർ കെ പുരം(417), ദ്വാരക നരേല(404), ഒഖ്ല നരേല(402) തുടങ്ങിയ സ്ഥലങ്ങളിലാണ് മലിനീകരണം അതിരൂക്ഷമായിട്ടുള്ളത്.
വായുഗുണനിലവാര സൂചികയിൽ 400നു മുകളിൽ കടക്കുന്നതോടെ ഗുരുതാവസ്ഥയിലും 450 കടക്കുന്നതോടെ മലിനീകരണത്തോത് അതീവ ഗുരുതരാവസ്ഥയിലെത്തിയതായുമാണ് കണക്കാക്കുന്നത്.
കഴിഞ്ഞ രണ്ടാഴ്ചയ്ക്കുള്ളിൽ നഗരത്തിൻറെ വായുവിൻറെ ഗുണനിലവാരം കുത്തനെ ഇടിഞ്ഞിരുന്നു. എന്നാൽ ഇതിനിടെ മഴ ലഭിച്ചതോടെ ദീപാവലി ദിനത്തിൽ വായുഗുണനിലവാര സൂചിക മെച്ചപ്പെട്ട് 218 വരെയെത്തിയിരുന്നു.
ദീപാവലി ദിനത്തിൽ പകൽ ഡൽഹിയിൽ നല്ല അന്തരീക്ഷമായിരുന്നു. എന്നാൽ തിങ്കളാഴ്ച ആളുകൾ പടക്കംപൊട്ടച്ചതോടെ വീണ്ടും മോശമാകാൻ ഇടയാക്കി.
അന്ന് വൈകീട്ട് നാലിന് ശരാശരി വായു ഗുണനിലവാര സൂചിക 218 ആയിരുന്നു. രാത്രിയിലെ അനിയന്ത്രിത പടക്കം പൊട്ടിക്കലോടെയാണ് സ്ഥിതി വഷളായത്. തിങ്കളാഴ്ച പുലർച്ചെ വായു ഗുണനിലവാര സൂചിക 275 ആയിരുന്നെങ്കിൽ വൈകീട്ടോടെ അത് 358 ലേക്കെത്തിയതായി കണക്കുകൾ വ്യക്തമാക്കുന്നു.
വയനാട് സി.പി.എം ജില്ലാ സെക്രട്ടറിയായിരുന്ന പി ഗഗാറിനെ മാറ്റി, പകരം കെ റഫീഖിന് ചുമതല കൈമാറി 
