പാലക്കാട് കുഴിച്ചിട്ട നിലയിൽ കണ്ടെത്തിയ മൃതദേഹങ്ങൾ കാണാതായ യുവാക്കളുടേത്

പാലക്കാട്: കരിങ്കരപ്പുള്ളിയിൽ കുഴിച്ചിട്ട നിലയിൽ കണ്ടെത്തിയ മൃതദേഹങ്ങൾ കാണാതായ യുവാക്കളുടേത് തന്നെയെന്ന് സ്ഥിരീകരിച്ചു. പുതുശ്ശേരി കാളാണ്ടിത്തറയിൽ സതീഷ്(22), കൊട്ടേക്കാട് കാരക്കോട്ടുപുര തെക്കേംകുന്നം ഷിജിത്ത്(22) എന്നിവരാണ് മരിച്ചത്.

കാട്ടുപന്നിക്കു വച്ച വൈദ്യുതിക്കെണിയിൽ പെട്ടാണ് യുവാക്കൾ മരിച്ചത്. മൃതദേഹങ്ങൾ കണ്ടപ്പോഴുണ്ടായ പരിഭ്രാന്തിയിൽ കുഴിച്ചിടുകയായിരുന്നെന്നും സ്ഥലമുടമ അമ്പലപ്പറമ്പ് വീട്ടിൽ അനന്തൻ(52) പൊലീസിന് മൊഴി നൽകി. നിലവിൽ ഇ‍യാൾ പൊലീസിൻറെ കസ്റ്റഡിയിലാണ്. ബുധനാഴ്ച രാവിലെയാണ് മൃതദേഹങ്ങൾ പുറത്തെടുത്തത്ത്. തുടർന്ന് ഇൻക്വസ്റ്റ് നടപടികളും ആരംഭിച്ചു. കുഴിയിൽനിന്ന് മൃതദേഹങ്ങൾ ഒന്നിന് മുകളിൽ ഒന്നായിട്ടാണ് കിടന്നിരുന്നത്.

ഇവ പുറത്തെടുക്കുമ്പോൾ വസ്ത്രങ്ങളില്ലാത്ത നിലയിലായിരുന്നു. തുടർന്ന് ഇൻക്വസ്റ്റ് നടപടികളും ആരംഭിച്ചു. മൃതദേഹങ്ങൾ പുറത്തെടുത്ത് പരിശോധിച്ചതോടെയാണ് കാണാതായ യുവാക്കളുടെതാണെന്ന് വ്യക്തമായത്.

സംഭവത്തിൽ മറ്റാർക്കെങ്കിലും പങ്കുണ്ടോയെന്ന് കൂടുതൽ അന്വേഷിച്ചു വരികയാണെന്ന് പൊലീസ് അറിയിച്ചു. പാടത്ത് കാട്ടുപന്നിക്കായി വൈദ്യുതിക്കെണി വച്ചിരുന്നതായി കസ്റ്റഡിയിലുണ്ടായിരുന്ന സ്ഥലമുടമ മൊഴി നൽകിയിരുന്നു.

എന്നാൽ യുവാക്കളാണ് അതിൽ പെടുന്നത്. മൃതദേഹങ്ങൾ കണ്ടപ്പോൾ പെട്ടന്നുണ്ടായ പരിഭ്രാന്തിയിൽ കുഴിച്ചിട്ടുവെന്നും സ്ഥലമുടമ മൊഴി നൽകി. തിങ്കളാഴ്ച പുലർച്ചെ 4.50 നാണ് യുവാക്കൾ പാടത്തേക്ക് ഓടുന്നത്. പിന്നീട് ഇവരെ കണ്ടിട്ടില്ല. ഒരു അടിപിടിക്കേസുമായി ബന്ധപ്പെട്ട്, 4 പേരെ പൊലീസ് തിരഞ്ഞിരുന്നു. ഇതിലെ 2 പേരെയാണ് പിന്നീട് കാണാതാകുന്നത്.

ഇവർ പാടത്തേക്ക് പോകുന്നതിൻറെ സിസിടിവി ദൃശ്യങ്ങൾ പൊലീസിന് ലഭിച്ചിരുന്നു. ഇതിൻറെ അടിസ്ഥാനത്തിൽ നടത്തിയ പരിശോധനയിലാണ് കൊടുമ്പ് സ്‌കൂളിന് സമീപത്തെ പാടത്ത് മണ്ണ് മാറികിടക്കുന്നത് കണ്ടത്. ഇവിടെ പ്രാഥമികമായി നടത്തിയ പരിശോധനയിൽ മൃതദേഹങ്ങൾ കുഴിച്ചിട്ടതായിരിക്കാമെന്നായിരുന്നു പോലീസ് സംശയിച്ചത്.

തുടർന്ന് സ്ഥലമുടമയെ കസ്റ്റഡിയിലെടുത്ത് കൂടുതൽ അന്വേഷണം നടത്തിയപ്പോഴാണ് മൃതദേഹങ്ങൾ കണ്ടെത്തുന്നത്. കേസുമായി ബന്ധപ്പെട്ട് മറ്റു 2 യുവാക്കളും പൊലീസ് കസ്റ്റഡിയിലുണ്ട്.