ഇന്ത്യ-പാക് മത്സരത്തെ ഉറ്റുനോക്കി ഇന്റലിജന്‍സ്; അധോലോക നേതാക്കള്‍ എത്തുമെന്ന് വിവരം

ഏഷ്യാകപ്പിന് ഇന്ന് പന്തുരുളുമ്പോള്‍ ക്രിക്കറ്റ് ലോകം ആവേശത്തിലാണ്. ഇന്ത്യ-ഹോങ്കോങ് മത്സരത്തിനാണ് അദ്യം ബാറ്റ് വീശുക. ഇന്ത്യയും പാകിസ്താന്‍ തമ്മിലുള്ള പോരാട്ടത്തിനാണ് ഏവരും കാത്തിരിക്കുന്നത്. ഇരു രാജ്യങ്ങളും തമ്മില്‍ നിലനില്‍ക്കുന്ന പ്രശ്‌നങ്ങള്‍ മൂലം പരമ്പരകള്‍ക്ക് സാധ്യതയില്ലാത്തതിനാല്‍ ഐസിസി ടൂര്‍ണമെന്റുകളില്‍ മാത്രമാണ് ചിരവൈരികള്‍ തമ്മിലുള്ള പോരാട്ടം കാണാന്‍ സാധിക്കൂ.

അതുകൊണ്ട് തന്നെ ഇന്ത്യക്കാര്‍ ഏറെയുള്ള യുഎഇയില്‍ നടക്കുന്ന പോരാട്ടത്തിന് സ്‌റ്റേഡിയം നിറയുമെന്ന കാര്യത്തില്‍ സംശയം വേണ്ട. എന്നാല്‍, ഇന്ത്യ-പാക് പോരാട്ടം ചുറ്റിപറ്റി മറ്റൊരു വാര്‍ത്തയാണ് പുറത്ത് വരുന്നത്. അധോലോക നേതാവ് ദാവൂദ് ഇബ്രാഹിമിന്റെ ഡി കമ്പനിയുമായി ബന്ധപ്പെട്ട രണ്ട് പേര്‍ മത്സരം കാണാന്‍ എത്തുമെന്നാണ് ഇന്റലിജന്‍സ് റിപ്പോര്‍ട്ട്.

മുംബൈയിലും കറാച്ചിയിലുള്ള ദാവൂദിന്റെ ബന്ധുക്കള്‍ ഇതിനകം മത്സരം കാണാന്‍ ദുബായില്‍ എത്തിയതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. ഇതോടെ ആറ് രാജ്യങ്ങളിലെ ഇന്റലിജന്‍സ് ഏജന്‍സികളാണ് മത്സരത്തെ ശ്രദ്ധയോടെ വീക്ഷിക്കുന്നത്. ദാവൂദ് ഇബ്രാഹിമിന്റെ പാകിസ്താനിലെ ഒളിസങ്കേതത്തെപ്പറ്റി കൂടുതല്‍ വിവരങ്ങള്‍ ഇവരില്‍ നിന്ന് ലഭിക്കുമെന്നാണ് ഇന്റലിജന്‍സ് വിഭാഗം വിലയിരുത്തുന്നത്.

ദാവൂദ് ഇബ്രാഹിമിന് ഇന്ത്യ-പാക് മത്സരത്തോടുള്ള പ്രിയം നേരത്തെ പ്രസിദ്ധമാണ്. എന്നാല്‍, മത്സരത്തോട് അനുബന്ധിച്ചുള്ള വാതുവെയ്പ്പില്‍ കോടികളാണ് മറിയാറുള്ളത്. ഇന്ത്യയെ കൂടാതെ യുകെ, യുഎസ്, റഷ്യ, ചൈന എന്നീ രാജ്യങ്ങളുടെ ഇന്റലിജന്‍സ് വിഭാഗവും ദാവൂദിനെ കുറിച്ചുള്ള വിവരങ്ങള്‍ ലഭിക്കാനായി ശ്രമം നടത്തുന്നുണ്ട്.