മോദി സര്‍ക്കാരില്‍ അംഗമാകില്ല; കേന്ദ്രമന്ത്രിസഭയിലേക്കുള്ള പ്രവേശനം തന്റെ അജണ്ടയിലില്ലെന്ന് ജോസ് കെ.മാണി

തിരുവനന്തപുരം: കേന്ദ്രമന്ത്രിസഭാ പുനഃസംഘടനയില്‍ കേരളത്തില്‍നിന്ന് താനും മന്ത്രിസഭയിലെത്തുമെന്ന റിപ്പോര്‍ട്ടുകള്‍ നിഷേധിച്ച് കേരളാ കോണ്‍ഗ്രസ് (എം) നേതാവും കോട്ടയം എംപിയുമായ ജോസ് കെ.മാണി രംഗത്ത്. കേരളാ കോണ്‍ഗ്രസ് (എം) എന്‍ഡിഎയില്‍ ചേരുന്നുവെന്ന റിപ്പോര്‍ട്ടുകളെയും അദ്ദേഹം തള്ളിക്കളഞ്ഞു. ബിജെപിയുമായി എന്തെങ്കിലും തരത്തിലുള്ള ബന്ധമോ കേന്ദ്രമന്ത്രിസഭയിലേക്കുള്ള പ്രവേശനമോ തന്റെയോ പാര്‍ട്ടിയുടെയോ അജണ്ടയിലില്ലെന്ന് അദ്ദേഹം സമൂഹമാധ്യമത്തില്‍ പോസ്റ്റ് ചെയ്ത കുറിപ്പില്‍ വ്യക്തമാക്കി.

പുനഃസംഘടനയോടെ ജോസ് കെ.മാണി നരേന്ദ്ര മോദി മന്ത്രിസഭയില്‍ അംഗമാകുമെന്ന അഭ്യൂഹങ്ങള്‍ക്കിടെയാണ് വിശദീകരണവുമായി ജോസ് കെ. മാണി രംഗത്തുവന്നത്. ”ബിജെപി ബന്ധമോ കേന്ദ്രമന്ത്രിസഭയിലേയ്ക്കുള്ള പ്രവേശനമോ എന്റെയോ കേരളാ കോണ്‍ഗ്രസ് പാര്‍ട്ടിയുടെയോ രാഷ്ട്രീയ അജണ്ടയില്‍ ഇല്ല എന്നത് അസന്നിഗ്ദ്ധമായി ആവര്‍ത്തിക്കുകയാണ്. ഇത്തരമൊരു നുണപ്രചരണം ആവര്‍ത്തിക്കുന്നതിന്റെ പിന്നില്‍ മറ്റെന്തെങ്കിലും താത്പര്യങ്ങളാണോ എന്നു സംശയിക്കേണ്ടിയിരിക്കുന്നു.”- ജോസ് കെ. മാണി സമൂഹമാധ്യമത്തില്‍ കുറിച്ചു.

ന്യൂനപക്ഷങ്ങളെ പാര്‍ട്ടിയോടുപ്പിക്കണമെന്ന് ആവശ്യപ്പെട്ട് ബിജെപി ദേശീയ അധ്യക്ഷന്‍ അമിത്ഷാ കേരളാ ഘടകത്തിനു നിര്‍ദ്ദേശം നല്‍കിയിരുന്നു. ഇക്കഴിഞ്ഞ ജൂണില്‍ പാര്‍ട്ടി ദൗത്യവുമായി കേരളത്തിലെത്തിയപ്പോഴാണ് അമിത്ഷാ ഈ നിര്‍ദ്ദേശം മുന്നോട്ടു വച്ചത്. തുടര്‍ന്ന് എന്‍ഡിഎയിലേക്ക് കൊണ്ടുവരേണ്ട രാഷ്ട്രീയ പാര്‍ട്ടികളുടെയും നേതാക്കളുടേയും പട്ടിക കേന്ദ്ര നേതൃത്വത്തിന്റെ നിര്‍ദേശാനുസരണം സംസ്ഥാന നേതൃത്വം കൈമാറിയിരുന്നു. കേരള കോണ്‍ഗ്രസ് മാണി വിഭാഗത്തിലെയും ബിഡിജെഎസിലെയും നേതാക്കളില്‍ ചിലര്‍ പട്ടികയിലുണ്ടായിരുന്നു.

ഈ പശ്ചാത്തലത്തില്‍ കെ.എം. മാണിയെയും അദ്ദേഹത്തിന്റെ പാര്‍ട്ടിയെയും ബിജെപിയോട് അടുപ്പിക്കാനുള്ള ശ്രമം സംസ്ഥാന നേതാക്കള്‍ നടത്തിവരികയാണ്. കെ.എം. മാണിയുടെ പഴയ സഹയാത്രികനും ഇപ്പോള്‍ എന്‍ഡിഎയ്‌ക്കൊപ്പമുള്ള നേതാവുമായ പി.സി. തോമസാണ് ഇതുസംബന്ധിച്ച നീക്കങ്ങള്‍ക്കു കൊടി പിടിക്കുന്നത്. യുഡിഎഫ് വിട്ട കെ.എം. മാണി മുന്നണി മാറ്റത്തിന്റെ സാധ്യതകള്‍ ആരായാതെ സ്വതന്ത്രനായി നില്‍ക്കുന്നതും ഇത്തരം പ്രചാരണങ്ങള്‍ക്ക് ആക്കം കൂട്ടി.

അതേസമയം, ലോക്‌സഭാ തിരഞ്ഞെടുപ്പ് മുന്നില്‍ കണ്ടാണ് കേരളത്തിലും നിര്‍ണായകമായ രാഷ്ട്രീയ ചുവടുവയ്പ്പുകള്‍ക്ക് ബിജെപി തയ്യാറെടുക്കുന്നത്. താഴേത്തട്ടില്‍ പ്രവര്‍ത്തനം ശക്തമാക്കുന്നതിനൊപ്പം പത്തു ലോക്‌സഭാ സീറ്റെന്ന ലക്ഷ്യത്തിലെത്താന്‍ ന്യൂനപക്ഷങ്ങളെ പാര്‍ട്ടിയോടടുപ്പിക്കണമെന്ന തിരിച്ചറിവാണ് പുതിയ നീക്കങ്ങള്‍ക്ക് പിന്നില്‍. ന്യൂനപക്ഷങ്ങളോട് ബിജെപി മുന്‍വിധിയോടെ പെരുമാറുന്നു എന്ന പ്രതിച്ഛായ മാറ്റിയെടുക്കലും പാര്‍ട്ടി ലക്ഷ്യമിടുന്നു.