കേരളത്തിന് സ്വപ്നസാഫല്യം; കൊച്ചി മെട്രോ പ്രധാനമന്ത്രി ഉദ്ഘാടനം ചെയ്തു

കൊച്ചി: കേരളത്തിന്റെ വികസന സ്വപ്നങ്ങൾക്കു കുതിപ്പ് നൽകുന്ന കൊച്ചി മെട്രോ റെയിൽ പ്രധാനമന്ത്രി മോദി ഉദ്ഘാടനം ചെയ്തു. കെഎംആർ‌എൽ എംഡി ഏലിയാസ് ജോർജ് സ്വാഗതം ആശംസിച്ചു. മെട്രോ യാത്രക്കാർക്കായുള്ള കൊച്ചി വൺ സ്മാർട്ട് കാർഡ് കേന്ദ്രമന്ത്രി വെങ്കയ്യ നായിഡു പുറത്തിറക്കി. സ്വാഗതം ആശംസിച്ചപ്പോൾ ഇ.ശ്രീധരന് വൻകയ്യടിയാണ് ലഭിച്ചത്. മിനിറ്റുകളോളം നീണ്ടുനിൽക്കുന്ന കരഘോഷത്തിനാണ് സദസ്സ് സാക്ഷ്യം വഹിച്ചത്. മെട്രോയ്ക്കുവേണ്ടിയുള്ള മൊബൈൽ ആപ്പ് മുഖ്യമന്ത്രി പിണറായി വിജയനും പുറത്തിറക്കി. ഗവർണർ ജസ്റ്റിസ് പി.സദാശിവം, മന്ത്രി തോമസ് ചാണ്ടി, കെ.വി.തോമസ് എംപി, മേയർ സൗമിനി ജയിൻ, പ്രതിപക്ഷ നേതാവ് രമേശ് ചെന്നിത്തല, ഡിഎംആർസി മുഖ്യ ഉപദേഷ്ടാവ് ഇ.ശ്രീധരൻ തുടങ്ങിയവരും ചടങ്ങിൽ പങ്കെടുക്കുന്നുണ്ട്.

കേരളത്തിൽ നിന്നുള്ള എല്ലാ എംപിമാർക്കും എംഎൽഎമാർക്കും ചടങ്ങിലേക്കു ക്ഷണക്കത്തു നൽകിയിട്ടുണ്ട്. ഫ്രഞ്ച്, ജർമൻ കോൺസുലേറ്റ് ജനറൽമാരും ഇന്ത്യയിലെ ഫ്രഞ്ച് അംബാസഡറും ചടങ്ങിൽ പങ്കെടുക്കും. കൊച്ചി മെട്രോയും ആക്സിസ് ബാങ്കുമായി ചേർന്നു പുറത്തിറക്കുന്ന ‘കൊച്ചി വൺ’ ടിക്കറ്റ് – ഡെബിറ്റ് കാർഡിന്റെ ഉദ്ഘാടനവും ചടങ്ങിൽ നിർവഹിക്കും. ആക്സിസ് ബാങ്ക് എംഡി ശിഖ ശർമ, മെട്രോയ്ക്കു വിദേശവായ്പ നൽകിയ ഫ്രഞ്ച് വികസന ഏജൻസി(എഎഫ്ഡി)യുടെ ഇന്ത്യയിലെ മേധാവി നിക്കോളാസ് ഫെർണേജ് എന്നിവരും ചടങ്ങിനെത്തും.

ആലുവ മുതൽ തൃപ്പൂണിത്തുറ വരെയാണു മെട്രോയുടെ ഒന്നാം ഘട്ടമെങ്കിലും പാലാരിവട്ടം വരെയുള്ള ഭാഗമാണു പൂർത്തിയായത്.

എംജി റോഡിൽ മഹാരാജാസ് കോളജ് വരെയുള്ള 18 കിലോമീറ്റർ ദൂരം രണ്ടു മാസത്തിനകം പൂർത്തിയാകും; തൃപ്പൂണിത്തുറയിലേക്ക് എത്താൻ രണ്ടു വർഷവും. കാക്കനാട് ഇൻഫോ പാർക്കിലേക്കുള്ള രണ്ടാംഘട്ട വികസനത്തിനു കേന്ദ്രാനുമതി കാത്തിരിക്കുകയാണ്.