സലാലയില്‍ മലയാളി യുവതി കൊല്ലപ്പെട്ടു; പ്രതി അറസ്റ്റില്‍

സലാല: സലാലയില്‍ ഹോട്ടല്‍ജീവനക്കാരിയായ മലയാളി യുവതി കൊല്ലപ്പെട്ടു. തിരുവനന്തപുരം സ്വദേശിയായ സിന്ധുവാണ് (32) കൊല്ലപ്പെട്ടത്. വെള്ളിയാഴ്ച രാവിലെ താമസസ്ഥലത്താണ് മൃതദേഹം കണ്ടെത്തിയത്. 24 മണിക്കൂറിനകം പ്രതിയെ റോയല്‍ ഒമാന്‍ പോലീസ് പിടികൂടി. മോഷണശ്രമം ചെറുക്കുന്നതിനിടെയാണ് സിന്ധു കൊല്ലപ്പെട്ടതെന്നാണ് റോയല്‍ ഒമാന്‍ പോലീസ് അറിയിച്ചു. സിന്ധു അണിഞ്ഞിരുന്ന ആഭരണങ്ങള്‍ മോഷ്ടാവില്‍നിന്ന് കണ്ടെടുത്തു. സംഭവം നടന്നതിനുശേഷം പൊലീസ് വ്യാപകമായ അന്വേഷണം നടത്തുന്നതിനിടെയാണ് ആദമില്‍വെച്ച് പ്രതി പിടിയിലായത്.

അനധികൃതമായി രാജ്യത്തെത്തിയ ആളാണ് പ്രതിയെന്ന് റോയല്‍ ഒമാന്‍ പോലീസ് വ്യക്തമാക്കി. സിന്ധുവിന്റെ മൃതദേഹം സലാല ഖാബൂസ് ആസ്പത്രിമോര്‍ച്ചറിയില്‍ സൂക്ഷിച്ചിരിക്കുകയാണ്. ഇന്ത്യന്‍ എംബസി കൗണ്‍സിലര്‍ മന്‍പ്രീത് സിങ്ങിന്റെ നേതൃത്വത്തില്‍ മൃതദേഹം നാട്ടിലേക്ക് അയക്കുന്നതിനുള്ള നടപടികള്‍ നടന്നുവരികയാണ്.

കഴിഞ്ഞ നാലുവര്‍ഷമായി സലാല ഹില്‍ടണ്‍ ഹോട്ടലിലെ ക്ലീനിങ് വിഭാഗത്തില്‍ ജോലിചെയ്തുവരികയായിരുന്നു സിന്ധു. സലാലയില്‍ മലയാളി നഴ്‌സായ ചിക്കു റോബര്‍ട്ട് 2016 ഏപ്രിലില്‍ സമാനമായ രീതിയില്‍ കൊല്ലപ്പെട്ടിരുന്നു. ബദര്‍ അല്‍ സമ ആസ്പത്രിയില്‍ നഴ്‌സായിരുന്ന ചിക്കുവിനെ താമസസ്ഥലത്ത് കുത്തേറ്റ് മരിച്ച നിലയില്‍ കണ്ടെത്തുകയായിരുന്നു. കാതുകള്‍ അറുത്ത നിലയിലായിരുന്നു. എന്നാല്‍, കേസില്‍ ഇതുവരെ പ്രതികളെ പിടികൂടാനായിട്ടില്ല.